ئەمڕۆ پێنجشەممە، ئاری كاكەشین بەڕێوەبەری سوتەمەنی ھەولێر بە ماڵپەڕی فەرمی پارتی راگەیاند، ئەوان رۆژانە لیژنەكانیان سەردانی بەنزینخانەكان دەكەن و پشكنین بۆ بەنزینەكە دەكەن و ھەر كەسێك سەرپێچیی رێنماییەكان بكات و ئۆكتانی بەنزینەكەی لە خوار ٩٠ بێت، سزای دەدەن.

 دەشڵێت، "لەماوەی سێ رۆژی رابردوودا نزیكەی١٠بەنزینخانەمان سزا داوە".

لەبارەی ھۆكارەكانی گرانبوونی نرخی بەنزینیشەوە، بەڕێوەبەری سوتەمەنی ھەولێر ئاماژەی بەوەکردووە، دوو ھۆكاری سەرەكی ھەن كە بوونەتە هۆی گرانبوونی نرخی بەنزین، یەكێكیان ئەوەیە كە ئێران گرانی كردووە و ئەوەی دیكەش لە پشكنین دەرناچێت، بەڵام حکومەتی ھەرێمی كوردستان دەتوانێ جێگرەوە بدۆزێتەوە و ئەو كێشەیە چارەسەر بكات.

ئاری كاكەشین چەند چەند هۆکارێکی دیکەی گرانبوونی نرخی بەنزینی خستەڕوو و وتی، بەرزبوونەوەی نرخی دۆلار و نەوت و ئەو رێنماییە تازانەی وەزارەتی سامانە سرووشتییەكان دەریكردوون، كە نابێت بەنزینی خراپ بۆ ھەرێمی كوردستان بێت، وای كردووە نرخی بەنزین ھەندێك گران بێت.

ماوەیەکە، نرخی بەنزین بەشێوەیەکی بەرچاو بەرزبووەتەوە و بەجۆرێک، لە رابردوودا نرخی لیترێک بەنزین لە جۆری نۆرماڵ لە نێوان٤٥٠ تا ٥٠٠ دیناردا بوو، بەڵام ئێستا نرخی یەک لیتر بەنزین لەجۆری نۆرماڵ بۆ ٧٠٠ دینار بەرزبووەتەوە.

نـ، غـ

کـ، ئـ