جێگری سەرۆکی هەرێم هۆشداری دەدات لە هەڵگیرسانی شەڕی نێوان پەکەکە و پێشمەرگە

جێگری سەرۆکی هەرێمی کوردستان رایگەیاند، لە ئێستادا هەوڵێک هەیە بۆ پەلکێشکردنی شەڕێکی نەخوازراو لەنێوان پەکەکە و هێزی پێشمەرگە لە خاکی هەرێمی کوردستاندا.

جەعفەرمستەفا جێگری سەرۆکی هەرێمی کوردستان لە پەیامێکدا هۆشداریی داوە، لە روودانی شەڕ لە نێوان هێزەکانی پێشمەرگە و پارتی کرێکارانی کوردستان (پەکەکە) و ئاماژە بەوەدەکات، ئەوەی ئێستا روودەدات، پلانی نەیارانی دژ بە نەتەوەی کوردە، دەخوازێت لە کوردانی هەر چوار پارچەی کوردستان دەست لەناو دەست بن بۆ چارەسەری ریشەیی هەموو ئەو زوڵم و ستەمەی، کە بە درێژایی مێژوو لێیان کراوە.

 باسی لەوەشکردوە، لەگەڵ هاتنی هیچ هێزێکی بێگانەدا نین، کە سنور و سەروەرییەکانی هەرێمەکەیان ببەزێنێت، لە هەمان کاتیشدا رێز لەو پارتە سیاسییانە دەگرن، کە لە خاکی هەرێم گیرساونەتەوە و رێگایان داون کار و چالاکیی سیاسی ئەنجام بدەن، بەڵام هەرگیز لەگەڵ ئەوەدا نین، کە ببنە مایەی شەڕ و ناسەقامگیری و هۆکاری چۆڵکردن و ماڵوێرانکردن و شەهیدکردنی دەیان خەڵکی سڤیل لە ناوچەکەدا.

ئەوەشی خستووەتەڕوو، سەنگەر لە یەکگرتن خزمەتە بە دوژمنانی گەلێکی ستەمدیدە و لە گۆڕنانی هەموو خەون و ئاواتەکانی رۆژانی پڕ لە تێکۆشان و خەبات و بەفیڕۆدانی خوێنی شەهیدەکانە.

ئەوەش لە کاتێکدایە، چەند مانگێکە تورکیا دەستی بە ئۆپراسیۆنەکانی کردووەتەوە لە هەرێمی کوردستان و لەگەڵ پەکەکەدا چەندینجار روبەڕوی یەکتری بوونەتەوە، کە بەوهۆیەوە چەندین کەس کوژراون و برینداربوون و زیان بە چەندین هاوڵاتی ناوچە سنورییەکان گەیشتووە.

بەگوێرەی وتەی وەزارەتی پێشمەرگە، رۆژی ٥ی ئەم مانگە، لە سنوری چیای مەتینای پەکەکە هێرشیانکردووەتە سەر ژمارەیەک پێشمەرگە و بەوهۆیەشەوە، پێنج پیشمەرگە شەهیدبوون و حەوتی دیکەش برینداربوون.

٨ی ئەم مانگەش، وەزارەتی پێشمەرگە وتی، لە ناحیەی دەرکاری سەر بە قەزای زاخۆ بە چەکی قەناس پێشمەرگەیەک شەهیدکراوە و پەکەکەش ئەنجامدەری هێرشەکەیە.

بەڵام چەند بەرپرسێکى پەکەکە ئەوەیان رەتکردەوە و بێئاگایی خۆیان لە هەردوو رووداوەکە راگەیاند و باسیان لەوەکرد، ئەوان تەنها لەگەڵ حکومەتى تورکیا شەڕدەکەن.