رۆژی ٤ی مانگ، ئۆتۆمبێلێک کە هەشت کۆچبەری کوردی تێدابوو وەرگەڕا و دەستبەجێ دوو کۆچبەریان گیانیان لەدەستدا و شەشی دیکەش برینداربوون، ئەمڕۆش یەکێکی دیکە لە بریندارەکان گیانی لەدەستدا، بەوەش تا ئێستا سێ کەس گیانیان لەدەستداوە و پێنج کەسیش برینداربوون.
لەوبارەیەوە، هەردی کەلاری کە هاوڕێی رامین بوو و یەکێک بووە لە پەنابەرە بریندارەکان بە ئێن ئاڕ تی راگەیاند، رامین برینەکەی سەختبووە و پشتێنی سەلامەتی ئۆتۆمبێلەکە لەملی ئاڵابوو و باری تەندروستی زۆر خراپبوو.
باسی لەوەشکردووە، "دوای ئەوەی بردیانین بۆ نەخۆشخانە و پشکنینی پزیشیمان بۆ کرا دەرکەوت، کە رامین کڵۆکی قاچی شکاوە و ریخۆڵەشی تەقیوە بۆ ئەو مەبەستەش نەشتەرگەری بۆ ئەنجامدرا"، وتووشییەتی، دوای رووداوەکە چەند جارێک لەگەڵ رامین قسەیانکردووە و زۆر ورەبەرز و خۆڕاگربووە.
رۆژی ٤ی مانگ، هەشت پەنابەری کورد لە سنوری یۆنان دوای ئەوەی ئۆتۆمبێلەکەیان ئاشکرادەبێت کە پەنابەری تێدایە، پۆلیس دەکەوێتە شوێنیان و شۆفێرەکە خێراییەکەی زیاددەکات بۆیە ئۆتۆمبێلەکەیان وەردەگەڕێت.
لە ئەنجامی رووداوەکەدا، دوو پەنابەر گیانیان لەدەستدا و شەش پەنابەری دیکەش برینداربوون و ئەمڕۆش یەکێک لەو شەش پەنابەرە بەهۆی سەختی برینەکەیەوە گیانی لەدەستدا.
ئەمەش لەکاتێکدایە، لە مانگی رابردوودا، لە رووداوێکی هاتوچۆدا لە تورکیا کۆچبەرێکی هەرێمی کوردستان کە دانیشتووی قەزای سەیدسادق بوو بەهۆی وەرگەڕانی پاسێکی گواستنەوەی کۆچبەران، گیانی لەدەستدا و دواتر تەرمەکەی گەڕێنرایەوە هەرێم.
ساڵانە چەندان گەنج لە هەرێمی کوردستانیشەوە کۆچ بۆ دەرەوەی وڵات دەکەن، ئەوەش سەرەڕای ئەوەی هەرێم خاوەنی نەوت و گازی سروشتییە و خاکێکی بەپیت و فراوانی کشتوکاڵییە.
بەشێک لەو گەنجانەی کۆچ دەکەن دەڵێن، دۆخی خراپی ئابوری و سیاسی و هەبوونی چەندین کێشەی جۆراوجۆر و لەسەروو هەمووشیانەوە گەندەڵی ئیداریی و سیاسی و ئابوری و سەختی ژیان و بێ ئومێدبوونیان لە باشتربوونی دۆخ و گوزەرانیان هۆکاری کۆچکردنیانە.
بەو هۆیەشەوە ژمارەیەک لە کۆچبەران بەهۆی وەرگەڕان و نقومبوونی بەلەمەکانیانەوە لە رێگا ئاوییەکاندا گیانیان لەدەستداوە یان توشی رووداوی هاتوچۆ بوون و بەشێکی دیکەشیان لەلایەن پۆلیسی وڵاتانەوە گیراون و دیپۆرتکراونەتەوە.
رەنج پشدەری، یۆنان
ئـ. بـ