بە گوێرەی بەڵگەکانی کۆمپانیایەکی پشکنینی کواڵێتی بەنزین رێژەی ئۆکتانی ئەو بەنزینەی دوێنێ لەلایەن سەرۆکی جوڵانەوەی نەوەی نوێوە بە بڕی ٥٠٠ دینار دابەشكرا لە نێوان ٩٤ بۆ ٩٥ ەو بەمەش ئەو بەنزینە موحەسەنە نەک نۆرماڵ.
بەگوێرەی بەڵگەکان، رێژەی ئۆکتانی بەنزینەکە بەرزە و هیچ گرفتێکی نییە و یەکێکە لە بەنزینە باشەکان.
دوێنێ پێنجشەممە ٢٤ی حوزەیران، شاسوار عەبدولواحید سەرۆکی جوڵانەوەی نەوەی نوێ لە‌دە‌ستپێشخە‌ریە‌كدا لە شاری سلێمانی بەنزینی نۆرماڵی بە ٥٠٠ دینار دابەشکرد و ئە‌مڕۆش بۆ دووەم رۆژ بەردەوامە.
ئە‌مە لە‌كاتێكدایە نرخی بەنزین لە‌شاروشارۆچكە‌كانی ھە‌رێمی كوردستان ٧٥٠ دینار بوو و لە‌دوای دە‌ستپێشخە‌ریە‌كە‌ی شاسوار عەبدولواحید لە‌بە‌شێكی بە‌نزینخانە‌كانی ھە‌ولێرو دھۆكدا نرخی بەنزین بۆ ٦٦٠ دینار دابەزی.
بەگوێرەی بەڵگە نامەکانی کۆمپانیای سەروەت بامۆکی بەنزینەکە موحەسەنە نەک نۆرماڵ.
ئەمڕۆ هەینی، بە پێی زانیارییەکانی پەیامنێری ئێن ئاڕتی لە سلێمانی، بۆ رۆژی دووەم دابەشکردنی بەنزین لەشاری سلێمانی بە ٥٠٠ دینار بەردەوامە.
شۆفێرێکی تاکسی بە ئێن ئاڕتی راگەیاند، "ئەوان هەموو خەڵکی هەژارن بۆیە هاتوونەتە ئەوێ و بارودۆخیان هیچ باش نییە و بەیانی تا ئێوارە ٢٠هەزار دینار پەیدا دەکەن و دەبێت ١٥ هەزاری بدەن بە بەنزین وبۆیە هاتوون لەو شوێنە بەنزین بە ٥٠٠ دینار بکەنە نێو ئۆتۆمبێلەکانیان."
شۆفێرێکی دیکە ئەوەی بۆ ئێن ئاڕتی خستەڕوو، بەرپرسانی پارتی و یەکێتی لە پشت گرانکردنی نرخی بەنزینەوەن و ئەرکی حکومەت بوو کە بەنزینی هەرزان بکردایە و دەستخۆشیشی لە شاسوار عەبدولواحید کرد بۆ ئەو هەڵوێستەی.
١٩ى ئەم مانگە شاسوار عەبدولواحید سەرۆکى جوڵانەوەى نەوەى نوێ لە فەیسبووکى خۆى بڵاویکردەوە، تەحەدای حکومەت و دەسەڵاتداران دەکات، ئەگەر راست دەکەن و ئەو پارەی زیادەی بەنزینە بۆ حیزب نییە، ئەوا رێیان بدەن ئەوان چەندین بازرگان هەیە کە قسەیان لەگەڵ کردوون دەتوانن بەنزین بهێنن و لیتری بە ٥٠٠ دینار بفرۆشن و ماوەی دوو رۆژ دەبێت لە شاری سلێمانی بەنزین بە ٥٠٠ دینار دەفرۆشرێت و پاشانیش لە هەولێر و دهۆکیش نرخی بەنزین دابەزی.
ئەمەش لەکاتێکدایە ماوەیەکە، نرخی بەنزین بەشێوەیەکی بەرچاو لە هەرێمدا بەرزبووەتەوە کە قۆناغ بە قۆناغ ئەو بەرزبوونەوەیە روویدا.
بەجۆرێک، لە رابردوودا نرخی لیترێک بەنزین لە جۆری نۆرماڵ لە نێوان ٤٥٠ تا ٥٠٠ دیناردا بوو، بەڵام ئێستا نرخی یەک لیتر بەنزین لە جۆری نۆرماڵ بۆ ٧٥٠ دینار بەرزبووەتەوە.
شـ ، فـ
