پارێزەرانی عەبدوڵا ئۆجالان رێبه‌ری پارتی كرێكارانی كوردستان بۆ ئەنجامدانی چاوپێکەوتن لەگەڵ ئۆجالان، داواکارییان لە داواکاری گشتیی شاری بوورسا تۆمار کرد.
رێزان ساریجا و رازیە ئۆزتورک و فایەق ئۆزگور ئەرول و جەنگیز یۆرۆکلی، پارێزەرانی عەبدوڵا ئۆجالان، رێبەری زیندانیکراوی پەکەکە جارێکی دیکە داواکاریان پێشکەشی داواکاریی گشتی کرد بۆ ئەوەی رێیان بدەن سەردانی دورگەی ئیمڕاڵی بکەن.
ئەوەش لەکاتێکدایە، لە ماوەکانی رابردوودا، چەند جارێک داواکاریان پێشکەش کردوە بۆ هەمان مەبەست، بەڵام دواکارییەکەیان ڕەتکراوەتەوە.
لە دوای بڵاوبوونەوەی ڤایرۆسی کۆرۆناوە، پارێزەرانی ڕێبەری زیندانیکراوی پەکەکە، چەندین جار داواکاریان پێشکەش کردوە، بۆ سەردانکردنی دورگەی ئیمراڵی، بەڵام بە بیانوی نەگونجانی کەش و هەواو کۆرۆنا و رەوشی نائاسایی، رێگریان لێکراوە.
عەبدوڵا ئۆجالان ئێستا تەمەنی بووەتە ٧٢ ساڵ و نزیکەی ٢٢ ساڵە لە زیندانی دورگەی ئیمرالیی زیندانیی کراوە.