لە نوسراوەکەی وەزیری رۆشنبیریدا هاتووە، "خەڵک‌ و رۆشنبیرانی هەورامان گلەیی لە حكومەتی هەرێم دەكەن لەوەی گرنگی بە شێوەزارەكەیان نادات لەناو پرۆگرامی خوێندندا" و داواش دەکات، "لە قۆناغی بنەڕەتیدا، لە سنوری پارێزگای هەڵەبجە وانەیەک بە شێوەزاری هەورامی بخوێندرێت."

وەزیری رۆشنبیری ئاماژەی بەوەكردووە، زاراوەی هەورامی دەیان هەزار لاپەڕە دەستنوسی كۆنی پێ نوسراوەتەوە و لە رابردوودا زمانی نوسین ‌و ئەدەبیاتی كوردی بووە، بۆیە داوا لە وەزارەتی پەروەردە دەكەن دراسەی ئەم بابەتە بكات‌ و بیخاتە بەردەم ئەنجومەنی وەزیرانەوە.  

حەمەی حەمەسەعید باسی لەوەشكردووە، "ماوەی زیاتر لە پێنج ساڵە یونسكۆ هۆشداری دەدات لە لەناوچوونی چەند زمان‌ و زاراوەیەک كە هەورامیش یەكێک لەو زاراوانە."

زاراوەی هەورامی؛ یەکێکە لە زاراوەکانی زمانی کوردی و بەشێک لە دانیشتوانی پارێزگای هەڵەبجە لە هەرێمی کوردستان بەو زاراوەیە قسە دەکەن.