مەترسیەکانی تورکیا لەسەر ئایندەی کورد لە ناوچەکەدا

13439 جار خوێندراوەتەوە

تادێت مەترسیەکانی تورکیا لەسەر هەرێمی کوردستان زیاتر دەبێت، بەجۆرێک کاربەدەستانی ئەو وڵاتە ئاشکراتر لە ڕابردوو باس لە خاوەندارێتی زەویەکانی ویلایەتی موسڵی کۆن دەکەن، ئەمە لە کاتێکدا زیاتر لە (٧٠) بنکەی سەربازی و (٣٠) هەزار چەکداریان لێرە نیشتەجێ کردووە و هەر جارە و لە ناوچەیەکەوە بەرەی شەڕ دەکەنەوە، ڕۆژانەش فرۆکە جەنگی و بێ فرۆکەوانەکانیان مەبەستیان کام جێگەبێت بۆمبارانی دەکەن، گوندەکان وێران دەکەن و هاوڵاتیان شەهید و بریندار دەکەن، قەد پاڵە بە ڕەز تەنراوەکان دەسوتێنن، دارەکان دەبڕنەوە و هەناردەی وڵاتی خۆیانی دەکەن، ئاژەڵەکان لە ناو دەبەن و زەرەر و زیان بە جوتیاران دەگەیەنن، قاڵبێکی یاسایشی داتاشیوە بۆ بردنی نەوتی ژێر زەویەکەمان، هەر ئەوە ماوە ئاشەکەمان پێ بەتاڵ کاتەوە و ئەو ڕیسەی بە خوێنی هەزاران شەهید هاتۆتەدی بیکاتەوە بەخوری. 

دەزانین ئامانجەکانی تورکیا چیە، بەڵام لە بێ دەنگی حکومەتی هەرێم تێناگەم!، (خوایە ئەمە چ سحرێکە؟)، لە گەرمەی ئەم مەترسیانەدا (پ. د. ک) بە ناڕەوا سەرقاڵی سەپاندنی یاسایە بەسەر (٥) ڕۆژنامەنوس و چالاکوانی مەدەنی، بە دەست وەردان لە مەکۆی هەولێری بزوتنەوەی گۆڕان بەنیازە درزبخاتە ناو  ڕێککەوتنی (یەکێتیی و گۆڕان)!، بە ڕفاندنی (٣) لە ئەندامانی (پەیەدە) لە فرۆکەخانەی هەولێر گرژیەکانی لەگەڵ ڕۆژئاوای کوردستان زیاد دەکات، بە بەردەوامیدان بە سیاسەتی لێبڕین سزای موچە خۆران دەدات و بە پەیڕەوکردنی سیاسەتی (ناوەندی بەهێز)یش چەند ساڵی ئایندە پارێزگاکان دەکاتە گوندێکی گەورە!، بە هەڵگیرساندنی شەڕی (کورد و کورد)یش هەموو شتێک لە ناو دەبات، لە پەنا ئەمانەشدا سوپای تورکیا سەرقاڵی جێبەجێکردنی ئەجێنداکانیەتی سێ سەرۆکایەتیەکەی هەرێمیش ( پێی ناڵێن بەری چاوت کلی پێوەیە). 

کورد لە ڕێگەی عیراقەوە دەتوانێت جیهانی عەرەبی و نەتەوەیەکگرتوەکان بکاتە پاڵپشتی خۆی، بەتایبەت میسر کە دەوری گرنگی لە ڕەنگڕێژی سیاسەتی ناوچەکە هەیە، خۆشبەختانە کورد پەیوەندی بەهێزی لەگەڵ میسر هەیە، هاوکات لە ڕێگەی پرۆژەی شامی نوێ کە لە نێوان (عیراق. میسر. ئەردەن) پێکهێنراوە و دوو ڕۆژ بەر لە ئێستا سێیەمین کۆبونەوەی لوتکەکە لە بغداد بەڕێوەچوو، کورد و عیراقیەکان دەتوانن سود لەم پرۆژەیە وەربگرن بۆ پاراستن و مانەوەی قەوارەی هەرێم بە سەلامەتی و دەرکردنی سوپای تورکیا لە خاکەکەمان و ڕاگرتنی پێشێلکاریەکانی تورکیا بە سەروەری خاکی عیراق.

لەسەر ئاستی ناوخۆش، بێدەنگی سێ سەرۆکایەتیەکەی هەرێم و لایەنە سیاسیەکان لە بەرژەوەندی کەس نیە، ئەو دەنگە ناڕازیەی لەسەر ئاستی تاک لە سەرکردایەتی حزبەکان هەیە لە ئاست وەڵامدەرەوەی مەترسیەکە نیە، بەڵکو بەرگرتن لەم کارەساتە پێویستی بە گرتنەبەری جێ و ڕێی چڕ هەیە بەم جۆرەی لای خوارەوە.  

وەک هەمیشە پارتی تایه پەنچەرەکەی بەردەم پێشکەوتن و سەقامگیری و یەکڕیزی کوردە، حزبەکانی دەرەوەی پارتی دەبێت بە ئاڕاستەی دژی لەشکرکێشی تورکیا لە هەرێم و ڕێگریکردن لە پارتی لە هەڵگیرساندنی شەڕی کورد و کورد لە ڕووی دبلۆماسیەوە هەنگاوەکانیان یەک خەن هەروەها جەماوەر و هاوڵاتیان لە سەرجەم شار و شارۆچکەکان بە تایبەت هەولێر هانبدەن بێنە شەقام و بەردەم سێ سەرۆکایەتیەکەی هەرێم و کونسڵخانەکان بە ناڕازەیەتیە مەدەنیەکانیان بتەنن، لێرەدا لە بەر ئەوە باس لە ڕۆڵی چالاکوان و ڕێکخرامەدەنی و هونەرمەندان و ڕۆشنبیران ناکەم، چونکە لە ڕابردوو ئێستاشدا بە ئەرکی سەرشانی خۆیان هەستاون هەرچەندە ئەمانیش بە قەیرانی متمانە و یەکنەخستنی هەنگاوەکانیان تێدەپەڕن. 


گەر لایەنه سیاسیەکانی دەرەوەی پارتی و گروپە مەدەنیەکان هەنگاوەکانیان یەک نەخەن، ئەوا چەندساڵی داهاتوو سوپای تورکیا لەبری سەر سنورەکان لە قەزا و ناحیەکاندا لەشکرکێشی ئەنجام دەدات و فرۆکەکانیشی لەبری چیا و دەشتەکان ناوجەرگەی شارەکان بۆمباران دەکات، بۆ ئێستاش پاساوەکانی تورکیا شەڕکردنە لەگەڵ پەکەکە، بەڵام لە ڕاستیدا ئامانجی سەرەکی تورکیا لەناو بردنی پێگەی کورد و هەڵوەشاندنەوەی قەوارەی هەرێمی کوردستانە.